April 2013

“ O colectivo “Fraga das Saímas” fomenta entre as súas socias a aprendizaxe da arte dos Artesáns cesteiros lucenses e aposta polo uso de materiais 100% ecolóxicos propios da zona, como é por excelencia o vimbio” manifestou a súa Presidenta durante a clausura do IIº Curso de cestería tradicional..

CLAUSURA DO CURSO DE CESTERÍA TRADICIONAL IMPARTIDO POLO MESTRE ARTESÁN ÓSCAR PRIETO.

O Centro Socio-Cultural de Santo André de Boimente acolleu esta última semana de marzo a IIª edición do curso de Cestería tradicional, organizado polo colectivo de mulleres rurais “Fraga das Saímas”.

Un dos obxectivos que persegue a Asociación con este tipo de iniciativas é contribuír a impulsar a recuperación, a conservación e o mantemento dos ofícios tradicionais da nosa terra que conforman un rico patrimonio artesanal de Galicia.

Este curso de Cestería Tradicional, impartido polo cesteiro mariñán Oscar Prieto, é o segundo curso que organiza o Colectivo de Mulleres Fraga das Saímas. O primeiro tivo lugar no ano 2010, e naquela ocasión o taller tiña por obxecto aprender as técnicas básicas do oficio de cestería e para o cal se empregara médula de roten, de orixe asiático que pola súa versatilidade facilitáballes aos iniciados neste oficio o seu manexo. Nesta 2ª Edición a finalidade deste curso práctico de cestería en vimbio era ensinar e recuperar as técnicas de entrecruzado de fibras vexetais flexibles como o vimbio para formar cestas, cestos e demais formas creativas con este material, como antigamente elaboraban os cesteiros da Mariña Lucense.

Durante a 1ª hora do curso foi dedicada polo artesán cesteiro a ensinarlles polo miúdo ás 10 alumnas participantes neste curso todo o proceso de recollida das ramas da vimbieira e a súa preparación.

As dez discípulas dedicáronse durante as oito horas que durou este taller, a aprender a arte de trenzar vimbio, material ecolóxico 100% e que nace abundantemente nas beiras dos ríos e regatos desta zona, ao obxecto de elaborar uns pequenos canastillos e para os cales necesitaron tanta maña e destreza como forza pola dificultade que entraña traballar cos vimbios.

A clausura do curso de cestería, celebrada o pasado 26 de marzo ás 20.30 h no Centro Socio-Cultural de San Andrés, estivo a cargo da Presidenta da Asociación Fraga das Saímas. Durante o acto Flor Chao agradeceu a asistencia das alumnas e alabou a capacidade de aprendizaxe de todas elas, así como a maestría do Cesteiro Oscar.

A presidenta aproveitou para informarlles ás socias presentes que a Directiva Fraga das Saímas está á espera de que o goberno municipal de Viveiro contrate, segundo a noticia publicada no Progreso o pasado 14 de marzo, cun operador de telecomunicacións o servizo de Internet de banda ancha para, entre outros, o Telecentro do Centro Socio-Cultural de Santo André de Boimente,  momento a partir do cal a Directiva poñerá en marcha a organización  do curso de iniciación  a Internet, aprobado na súa Asamblea xeral anual.